Лукашенко Путин ва Байден ўртасида учрашув ташкил қилмоқчи
У Байденни Минскка олиб келиш учун самолёт ҳам юборишини айтди.
Беларус Президенти Александр Лукашенко Минскда Россия ва АҚШ президентлари Владимир Путин ва Жо Байден билан қўшма учрашув ўтказишга тайёр.
"Учаламиз шу ерда учрашамиз. Бу урушни тугатиш учун амалга оширилади. Агар Байден рози бўлса, Полша атрофига мен самолёт юбораман. Мен сизга Владимир Владимирович Путин бу ерга келишига кафолат бераман, учаламиз ўтириб, барча муаммоларни шу ерда ҳал қиламиз.
Биз тўлиқ хавфсизлик, қулайликни таъминлаймиз. Ва энг муҳими, у бу ердан мамнун бўлиб учиб кетади", — дейди Беларус раҳбари.
Шу билан бирга, Лукашенко Байден Минскка учмаслигига ишончи комил эканини ҳам айтди.
"Йўқ, у бу ерга келмайди. Лекин урушни тўхтатиш бунга арзийди", — деди президент.
Маълумот учун, Байден 20-22 февраль кунлари Полшага ташриф буюрмоқчи.
