Андижонда ИИБ ходимига пора таклиф қилган аёл ушланди
Ҳозирда унга нисбатан жиноят иши очилган.
Андижон шаҳрида ички ишлар органи ходимига пора таклиф қилган аёл қўлга олинди. Бу ҳақда вилоят ИИБ ахборот хизмати хабар берди.
Қайд этилишича, муқаддам уч маротаба судланган, 1975 йилда туғилган фуқаро M.Г. Андижон шаҳрининг 3-кичик даҳа ҳудудида вақтинча яшаб, моддий манфаат эвазига ушбу хонадонда эркак ва аёл танишларининг жинсий алоқа қилишлари учун шароит яратиб берган. Бу ҳолат ҳудудий ички ишлар органлари профилактика инспектори томонидан аниқланиб, аёлнинг ушбу қилмиши расмийлаштирилган.
Фуқаро М.Г содир этган қилмишига қонуний чора кўрмаслик эвазига профилактика инспекторига пора сифатида 200 АҚШ доллари таклиф этган. Бироқ профилактика инспектори фуқаронинг пора бериши жиноий жавобгарликни келтириб чиқариши тўғрисида бир неча маротаба тушунтирсада, фуқаро пора таклиф қилишда давом этган.
2023 йил 3 февраль куни ўтказилган тезкор тадбир давомида фуқаро M.Г. ишини ижобий ҳал қилиб бериш эвазига профилактика инспекторига пора сифатида 200 АҚШ долларини берган вақтда ашёвий далиллар билан қўлга олинган.
Мазкур ҳолат бўйича фуқаро M.Г.гa нисбатан Жиноят кодексининг 211-моддаси 1-қисми (пора бериш) билан жиноят иши қўзғатилиб, ҳозирда дастлабки тергов ҳаракатлари ўтказилмоқда.
