Ўзбекистон ва Миср ўртасида фойдаланилмаган улкан салоҳият мавжуд

 

Қоҳирада икки мамлакат ўртасидаги иқтисодий ҳамкорликни янада ривожлантиришнинг истиқболли йўналишларига бағишланган давра суҳбати бўлиб ўтди.

 

Таъкидланишича, сўнгги йилларда иқтисодий соҳада Ўзбекистон-Миср муносабатлари фаол ривожланиш босқичига ўтган. 2017 йилдан буён ўзаро савдо ва сармоявий ҳамкорлик фаоллашиб, ушбу йўналишга устувор аҳамият берилмоқда.

 

Иқтисодий тадқиқотлар ва ислоҳотлар маркази ҳисоб-китобларига кўра, Ўзбекистон ва Миср ўртасидаги товар айирбошлаш ҳажми сўнгги беш йилда уч баробардан зиёд, 2017 йилда қарийб10 миллион доллардан 2022 йилда 30,5 миллион долларгача ошди. Ўзбекистоннинг Мисрга экспорти 16 баробарга ошган.

 

“Буларнинг барчаси Мисрлик йирик инвесторларга Ўзбекистондаги хилма-хил савдо-иқтисодий лойиҳаларида иштирок этиш, Марказий Осиёнинг қоқ Марказидаги жўғрофий ўрнини ҳисобга олган ҳолда қўшма инвестицион лойиҳаларини амалга ошириш, бу эса унумдорлик ва экспорт имкониятларини оширади”, — дейди Марказ директори Обид Ҳакимов.

 

Марказ директорининг сўзларига кўра, инвестицион соҳадаги ҳамкорлик ҳам фаол ривожланмоқда. Хусусан, Ўзбекистонда Мисрлик ишбилармонларнинг капитали иштирокида 29 та қўшма корхона фаолият кўрсатмоқда. Мисрнинг “Солифар” компанияси билан ҳамкорликда Тошкент вилоятидаги "Бўстонлиқ-фарм" ЭИЗда фармацевтика соҳасида (қиймати 20 млн доллар) ишлаб чиқариш лойиҳасини амалга ошириш бўйича ишлар олиб борилмоқда. Қашқадарё вилоятида гепатит C препаратларини ишлаб чиқаришни йўлга қўйиш бўйича (1,4 млн доллар) Мисрнинг “One World Pharma” компанияси билан ишлар олиб борилмоқда. «Kapo Agri» компанияси билан Наманган вилоятида балиқчилик соҳасидаги лойиҳа бўйича музокаралар бўлиб ўтказилди.

 

Шу билан бирга, Ўзбекистон ва Миср ўртасидаги ўзаро савдо ва инвестицион кўрсаткичлари ҳажми тўғрисидаги маълумотлар таҳлили натижасида ушбу соҳада ҳали фойдаланилмаган улкан салоҳият мавжуд эканлиги алоҳида қайд этиб ўтилди.