Ўқитувчилардан “комиссия учун” пул йиққан директор ишдан олинди

 

Ижтимоий тармоқларда Қорақалпоғистон Республикасининг Хўжайли туманидаги 21-сонли умумтаълим мактаби директори П.А. ўзи Тошкент шаҳрида бўла туриб, “комиссия учун” деган важ билан ўқитувчи ва техник ходимлардан 20 минг сўмдан пул йиғдиргани ҳақида хабар тарқалди. Туман прокуратураси ҳолат юзасидан маълумот берди.

 

Аниқланишича, жорий йилнинг 10 февраль куни мактаб директори П.А.нинг топшириғига асосан, мактаб ўқитувчиси Д.Р. томонидан 16 нафар ўқитувчидан 320 минг сўм йиғиб олинган ва директорга берилган. Директорнинг ўзи эса 18 нафар ўқитувчидан 360 минг сўм йиғиб олиб, жами 680 минг сўм пул йиғилган.

 

Мактаб директори п.А. ўз кўрсатмасида ушбу пуллар мактабдаги баннерларни янгисига алмаштириш учун йиғилганини, йиғилган пуллар амалда ҳеч қаерга ишлатилмасдан, ўқитувчиларга яна қайтариб берилганини баён қилиб ўтган.

 

Бир гуруҳ ўқитувчилар пулларни йиғилиш сабаблари ҳақида п.А. берган кўрсатмаларни тасдиқлашган, бир гуруҳи эса йиғилган пуллар келган комиссияни тушликда овқатлантириш баҳонасида йиғилганлигини баён қилишган. 2023 йил 24 феврал куни П.А. ўз ихтиёри билан ишдан бўшаш ҳақида ариза ёзган ва шунга асосан лавозимидан озод қилинган.  Ҳозирда терговга қадар текширув давом этмоқда.