Урушнинг тугаши, Путиннинг тугашидир — Гарри Каспаров
Сиёсатчи ва собиқ жаҳон чемпионинг уруш ҳақидаги фикрларини очиқлади.
БИЛД мухолифатчи сиёсатчи ва шахмат бўйича собиқ жаҳон чемпиони Гарри Каспаров билан суҳбатлашди.
Суҳбатдан асосий парчалар:
Путиннинг Украинани тўрт кун ичида босиб олиш режаси ҳақида:
“24 февраль куни Путиннинг ҳисоб-китоблари унинг Ғарб билан 20 йилдан ортиқ тажрибасига асосланган эди: у ўз мақсадларига эриша олади ва унинг йўлига ҳеч ким тўсқинлик қилмайди. Бу хатони бир пайтлар ҳамма нарсани қила олишига ишонган барча диктаторлар қилган”, дейди Каспаров.
Унинг фикрича, Украинанинг ўзини ҳимоя қилишга тайёрлиги ҳақида нафақат Путин, балки Ғарб экспертлари ҳам адашган.
“Путин Киевни тўрт кун ичида эгаллаб олмоқчи эди. Аммо бу хато эди. Марказий разведка бошқармаси ҳам буни кутганди. Европада ҳам уруш бунчалик узоқ давом этишига ва Украина қарши ҳужумга кириша олишига ҳеч ким ишонмасди”.
Путин нима учун урушни тўхтата олмаслиги ҳақида:
“Путиннинг ортга йўли йўқ. Унинг кучи урушнинг давом этишига таянади. Урушнинг тугаши унинг ҳам тугашидир. Менимча, у буни жуда яхши тушунади ва шу сабабли охиригача курашади, чунки муқобил вариант унинг сиёсий ва биологик ўлимдир ",— дейди Каспаров.
Россияликларни Кремль режимига қарши туришга нима мажбур қилиши мумкинлиги ҳақида:
“Руслар параллель дунёда яшайди. 1943-44 йиллардаги Германия каби. Жамият шундай ҳолатдаки, фақат қаттиқ ҳарбий мағлубият одамларни ҳақиқатга қайтариши мумкин. Украинани Путин қўшинларидан тозалаш ҳамда империя ва диктатура даври ўтганини англашнинг ўзи кифоя. Бошқа йўл йўқ”.
Ғарбнинг хатолари ҳақида:
“Муаммо шундаки, Ғарб ҳамиша воқеалар ривожидан бироз орқада қолади. Эслатиб ўтамиз: бошида танклар, жангчилар ва бошқа самарали қурол тизимларини етказиб бериш жуда узоқ давом этиши айтилган эди, чунки аскарлар биринчи навбатда ўқитилиши керак. Улар уруш бунчалик узоқ давом этади деб ўйламаган эдилар. Агар 2022 йил март-апрель ойларида вазиятни реал баҳолаш имкони бўлганида, уруш давом этиши аниқ бўларди. Ва украиналик танкчилар ва учувчиларни тайёрлаш оқилона бўлар эди. Аммо ўша пайтда дипломатик ечимлар ҳақида кўплаб иллюзиялар бор эди. Ғарб Украина ютқазмаслиги керак, Россия эса ғалаба қозонмаслиги керак деган шиордан Украина ғалаба қозониши керак деган формулага секин-аста ўтмоқда”.
