Туркия мухолифати президентликка номзодини кўрсатди

 

Олти партиядан иборат «Халқ иттифоқи» баҳорги сайловларда Кемал Қиличдорўғлини давлат раҳбари лавозимига ягона номзод сифатида кўрсатди. Бу ҳақда euronews хабар қилди. 

 

Қийин кечган мунозараларда «Яхши партия» раҳбари Мерал Акшенер унинг номзодига рози бўлмаган. У кўпроқ машҳур деб ҳисоблаган Истанбул ҳокими Экрем Имомўғли ёки Анқара ҳокими Мансур Явашни номзод этиб кўрсатишни таклиф қилган.

 

74 ёшли Кемал Қиличдорўғли Туркиянинг биринчи президенти Мустафо Камол Отатурк томонидан асос солинган Республика Халқ партияси раиси.

 

Мухолифат, агар унинг номзоди сайловларда ғалаба қозонса, мамлакатда парламент тизимини мустаҳкамлаш учун президент ваколатларининг бир қисмини чеклашни таклиф қилмоқда.

 

Ражаб Тоййиб Эрдоған 10 март куни сайловга тайёргарлик бўйича фармонни имзолашини маълум қилди. Фармон эълон қилинганидан кейин 60 кунлик сайловолди даври бошланади. Овоз бериш 14 май куни бўлиб ўтади.

 

Сайловолди ташвиқоти мамлакатда ҳалокатли зилзила оқибатларини бартараф этиш жараёни фонида ўтади. Номзодларнинг сайловолди баҳсларида шу мавзу устунлик қилади.

 

Маҳаллий таҳлилчиларга кўра, Эрдоған ва Қиличдорўғлининг ғалаба қозониш имкониятлари деярли тенг.