Хоразмда “замҳоким” автоҳалокатга учраб вафот этди
Ҳолат юзасидан вилоят прокуратураси расмий изоҳ берди.
Ижтимоий тармоқда Хоразм вилоятининг Гурлан тумани ҳокими ўринбосари У.Жумагалдиевнинг вафот этгани ҳақида хабарлар тарқалди. Ҳолат юзасидан вилоят прокуратураси расмий муносабат билдирди.
Маълум бўлишича, 1990 йилда туғилган Жумагалдиев Умиджон Усманбоевич 17 март куни соат 01:30 ларда автоҳалокатга учраган. У Nexia–3 русумли хизмат автомашинасида Урганч – Гурлан автомoбиль йўлида ҳаракатланиб бориб, ўзи билан бир йўналишда ҳаракатланиб бораётган фуқаро Ш.Собиров бошқарувидаги XCMG GR180 русумли юк автомашинасининг орқа ўнг томон ғилдирагига урилган. Шундан сўнг бошқарувни йўқотиши натижасида автомoбиль йўлидан чиқиб кетиб, йўл четидаги дарахтга урилган.
ЙТҲда У.Жумагалдиев олган тан жароҳатлари оқибатида ҳодиса жойида вафот этган. Ҳозирда мазкур ҳолат юзасидан Урганч туман прокуратураси томонидан терговга қадар текширув олиб борилмоқда.
