Конституция моддаларидан бири сўм ва унинг мақомига бағишланяпти

 

Валюта – давлатнинг пул бирлиги бўлиб, пул тизимининг асосий элементи ҳамда суверен давлатнинг белгиларидан биридир. Бошқача айтганда миллий валюта давлатнинг муҳим рамзларидан бири.

 

Ўзбекистон Республикасининг миллий валютаси сўм ҳам мустақил давлатимизнинг асосий белгиларидан бири ҳисобланади. Лекин Конституциямизда миллий валютамиз бўлган сўм ҳақида бирор оғиз гапирилмаган.

Шу сабабли мазкур бўшлиқ тўлдирилмоқда ва Конституциямизга миллий валютамиз ҳақидаги нормалар қўшиш таклиф этилмоқда.

 

Шуни инобатга олиш керакки, Конституция лойиҳасида пул бирлигини муомалада бўлиши унинг муомаладан олинишини тартибга солувчи субъект – яъни Марказий банк ҳам аниқ белгилаб кетилмоқда.

 

 

150-модда.

Ўзбекистон Республикасининг пул бирлиги сўмдир.

Сўм Ўзбекистон Республикасининг бутун ҳудудида ягона чекланмаган қонуний тўлов воситасидир.

Ўзбекистон Республикаси Марказий банки Ўзбекистон Республикасининг ҳудудида қонуний тўлов воситалари сифатида пул белгиларини муомалага киритишда ва уларни муомаладан чиқаришда мутлақ ҳуқуққа эгадир.

 

Давлат пул бирлигининг мақомини ҳамда унинг муомалада бўлишига оид қоидаларни Конституцияда белгиланган тақдирда унинг мавқеи ошишига олиб келади. Мамлакат пойтахти, давлат тили, байроғи, герби ва мадҳияси каби рамзлардан бири бўлган миллий валюта ҳам Бош Қомусда акс этиши мақсадга мувофиқ.

 

Бугунги глобаллашув шароитида давлатнинг пул бирлиги ва унинг қадр-қиммати алоҳида аҳамиятга эга. Мазкур масаланинг Конституциядан ўрин олиши турли таҳдид ва хавф-хатарларнинг ҳам олдини олади.