Тошкент метросининг 5 та янги бекати қуриб битказилди
Кеча бу йўналишда поездлар техник ҳаракати синовдан ўтказилган.
“Қўйлиқ–Қурувчилар” ерусти метро йўлининг 5 та бекати қуриб битказилди. Бу ҳақда “ЎзА” ахборот агентлиги хабар бермоқда.
2020 йилнинг август ойида Тошкент ерусти метросининг I босқичи, декабр ойида эса Сергели йўналиши очилганди.
Ҳозирда ерусти ҳалқа метро йўлининг II босқичи – 8,5 км узунликдаги 5 та бекатни ўз ичига олган «Қўйлиқ–Қурувчилар» қисми қуриб битказилган. Лойиҳанинг 3,8 км узунликдаги 2 та бекатни ўз ичига олувчи “Қурувчилар – Қипчоқ” қисмида қурилиш ишлари жадаллик билан олиб борилмоқда.
24 март куни мазкур йўналишлар бўйлаб поездлар техник ҳаракати синовдан ўтказилди.
Техник синовлардан сўнг мазкур йўналишда йўловчи ташувларининг бошланиши натижасида бир кунда 40 мингга яқин йўловчига хизмат кўрсатилади. Йўналишлар орасидаги қатновлар эса 15 дақиқани ташкил этади.
