Германия Термиз аэропорти модернизацияси учун 1 миллион евро ажратди
Бу ҳақда Германиянинг Тошкентдаги элчихонаси маълум қилди.
Германия Қуролли кучлари маблағлари ҳисобидан Термиз аэропортининг 12 километрдан ортиқ узунликдаги ташқи тўсиғи бўйлаб ва аэропорт ҳудудидаги тегишли операция марказида халқаро авиация стандартларига мувофиқ хавфсизлик ва кузатув технологиясини 1 миллион евродан ортиқ маблағга молиялаштирди. Бу ҳақда Германиянинг Тошкентдаги элчихонаси маълум қилди.
Аэропортни модернизация қилишда ёритиш ускуналари учун замонавий, тежамкор LED лампалардан фойдаланилган.
«Ҳарбий атташемиз шу ҳафта аэропорт майдонида ўрнатиш ишлари якунланганини кўришга муваффақ бўлди. Термиз халқаро аэропортида олиб борилаётган модернизация ишлари бизда катта таассурот қолдирди ва бунга самарали ҳисса қўшганимиздан мамнунмиз», — дейилади хабарда.
Элчихонанинг қўшимча қилишича, 2002-2015 йиллар оралиғида Германия Қуролли кучлари Афғонистондаги ISAF халқаро барқарорлаштириш миссияси доирасида Ўзбекистоннинг жанубий қисмидаги Термиз аэропортидан ҳаво транспорти учун стратегик марказ сифатида фойдаланган.
«Германия Қуролли кучлари олиб чиқилганидан кейин ҳам биз замонавий халқаро тижорат аэропортига айланиш йўлида ушбу аэропорт билан чамбарчас боғлиқмиз», – дейди Германия томони.
