Қўқонда талаба қизлар ётоқхонасига яширин камера ўрнатилди
Ҳолат бўйича вазирлик муносабат билдирди.
Ижтимоий тармоқларда Қўқон педагогика институтининг талабалар тураржойида қизларнинг хонасида яширин камера ўрнатилгани ҳақида хабарлар тарқалди. Ҳолат юзасидан Олий таълим, фан ва инновациялар вазирлиги расмий муносабат билдирди.
Қайд этилишича, бугун, 4 апрель куни вазирлик расмий телеграм каналининг мулоқот ботига қизлар яшайдиган ТТЖ хоналаридан бирига кузатиш камераси яширинча ўрнатилгани ҳақида маълумот берилган.
Вазирликнинг Фарғона ҳудудий бошқармаси масъуллари институтга бориб, вазиятни ўрганганда қизларнинг хонасига видеокамера ўрнатилгани аниқланган.
“Олий таълим, фан ва инновациялар вазирлиги ушбу воқеа юзасидан хизмат текшириши ўтказилишини ва айбдор шахслар аниқлангач, уларга нисбатан тегишли чоралар кўрилишини маълум қилади”, — дейилади хабарда.
