Қашқадарёда 13 ёшли қизни зўрлаган эркак қамоққа олинган — Олий суд
Эртага унинг иши ёпиқ судда кўриб чиқилади.
Ижтимоий тармоқда Қашқадарё вилоятининг Чироқчи туманида 13 ёшли қиз 51 ёшли эркак томонидан зўрлангани ҳақида хабарлар тарқалмоқда. Ҳолат юзасидан Олий суд матбуот котиби Азиз Абидов расмий ахборот берди.
Қайд этилишича, мазкур жиноят 1971 йилда Қашқадарё вилоятида туғилган К.Т томонидан содир этилган. Унга нисбатан қамоққа олиш тарзидаги эҳтиёт чораси қўлланиб, Жиноят кодексининг 129-моддаси (ўн олти ёшга тўлмаган шахсга нисбатан уятсиз-бузуқ ҳаракатлар қилиш) 2-қисми ва 118-моддаси (номусга тегиш) 3-қисми “а” банди билан жиноят иши қўзғатилган.
Айбланувчига оид жиноят иши ЖИБ Чироқчи туман судида 7 апрель куни кўриб чиқилади.
Жиноят-процессуал кодексининг 19-моддаси (судда жиноят ишларининг ошкора кўрилиши) талабларига мувофиқ мазкур жиноят иши ёпиқ суд мажлисида кўриб чиқилиши маълум қилинган.
