Финляндия ҳукумати истеъфога чиқди
Бош вазир Санна Марин президентдан истеъфо сўраган.
Финляндия бош вазири Санна Марин президент Саули Ниинистага истеъфога чиқиш тўғрисида ариза юборди.
Маросим бугун эрталаб Финляндия президентининг Хелсинкидаги расмий қароргоҳида бўлиб ўтди.
“Ҳурматли республика Президенти, мени ва ҳукумат кенгашининг бошқа аъзоларини ишдан бўшатишингизни ҳурмат билан сўрайман”, — деди Марин.
Президент Ниинисте унинг истеъфосини қабул қилди. Марин ҳукумати парламентдаги партиялар янги вазирлар маҳкамасини тузмагунча муваққат ҳукумат сифатида ишлайди.
Эслатиб ўтамиз, Санна Марин ҳукуматининг истеъфога чиқиши мамлакатда 2 апрель куни парламент сайловлари ўтказилиши билан боғлиқ бўлиб, унда унинг Социал-демократик партияси (СДП) учинчи ўринни эгаллаган.
Сайловда ғалаба қозонган Миллий коалиция партияси раҳбари Петтери Орпо ҳукумат тузиш бўйича маслаҳатлашувларни келаси ҳафта бошлаши кутилмоқда.
