Гамбург аҳолиси эшик-деразаларни очмаслик ҳақида огоҳлантирилди
Одамлардан, шунингдек, ташқарига чиқмаслик сўралди.
Германиянинг Гамбург шаҳри аҳолиси деразаларни ёпишга, кондиционерларни ўчиришга чақирилмоқда. Саноат омборида юз берган ёнғиндан чиққан заҳарли тутун туфайли айрим фуқаролар эвакуация қилинмоқда.
Ёнғин юк машиналарининг тўхташ жойида содир бўлган, кейин аланга яқин атрофдаги омборларга ўтган. Қисқа фурсатда тутун булути Гамбург марказини қоплаб, шаҳарнинг бир қанча туманларига тарқалди.
Фуқаро муҳофазаси федерал бошқармаси тутун маҳаллий аҳоли саломатлигига таҳдид солаётганини айтди. Агентлик ёнғин ва тутунни “ўта хавфли” тоифага киритди. Одамлар уйларини тарк этмаслик ҳақида огоҳлантирилган.
