Қорақалпоғистонда ўқувчиларга берилган егулик ичидан таблетка чиққани айтилмоқда
Аввалроқ Хўжайли туманида ҳам мактаб ўқувчиларига берилган озиқ-овқат маҳсулотлари орасидан қум ва қизлар тўғноғичи чиққанди.
Ижтимоий тармоқда Қорақалпоғистоннинг Элликқалъа тумани ХТБга қарашли мактабларнинг бирида ўқувчиларга берилаётган озиқ-овқат маҳсулотлари ичидан таблетка чиққани ҳақида ўқувчи ота-онасининг мурожаати тарқалди. Ҳолат юзасидан Элликқалъа тумани ҳокимлиги Ахборот хизмати муносабат билдирди.
Қайд этилишича, туман прокуратураси ва туман санитария-эпидемиологик осойишталик ва жамоат саломатлиги бўлими масъул ходимлари томонидан ўрганиш ишлари олиб борилган.
5-умумий ўрта таълим мактабига 2023 йил 13 апрель куни "Tabassum NUKUS" МЧЖ томонидан 267 нафар бошланғич синф ўқувчилари учун озиқ-овқат маҳсулотлари мактаб ишчи гуруҳи томонидан қабул қилинган. Ҳолат юзасидан экспертиза хулосасини олиш учун озиқ-овқат маҳсулотлари намунаси Қорақалпоғистон Давлат санитария-эпидемиологик осойишталик ва жамоат саломатлиги бошқармасига юборилган.
"Таҳлил натижалари чиққандан сўнг қўшимча маълумот берилади", — дейилади хабарда.
Эслатиб ўтамиз, аввалроқ Қорақалпоғистоннинг Хўжайли туманида мактаб ўқувчиларига берилган озиқ-овқат маҳсулотлари орасидан қум ва қизлар тўғноғичи чиққанди.
