Тўрткўлда Malibu ҳайдовчиси ногирон фуқарони калтаклади
Ҳолат бўйича прокуратура маълумот берди.
Ижтимоий тармоқларда Қорақалпоғистон Республикасининг Тўрткўл туманида 15 бола бир болани аёвсиз калтаклагани айтилган видео тарқалди. Республика прокуратураси ҳолат юзасидан муносабат билдирди.
Қайд этилишича, 24 апрель куни соат 16:00 ларда фуқаро И.И. бошқарувидаги Malibu русумли автомашинасида 1-гуруҳ ногирони Д.б. бошқарувидаги Spark русумли автотранспорт воситасини орқасидан қувиб келиб, тўхтатган. У “нега мени йўлда қисиб кетдинг” деган баҳона билан болаликдан ногирон, икки оёғи ишламайдиган Д.Б.ни юзларига қўллари билан уриб, тан жароҳати етказган ҳамда воқеа жойидан кетган.
Фуқаро Д.Б. ўзининг калтакланганлиги ҳақида акаси Д.М. ҳамда укаси Д.А.ларга хабар берганидан кейин ака-укалар вазиятга ойдинлик киритиш мақсадида И.И.ни телефон орқали туманнинг Ёшлик маҳалласидаги “Самарқанд” кўчаси бўйида жойлашган боғ олдида учрашувга чақиришган.
Шу куни соат 18:00 ларда учрашувга И.И. таниши б.У. билан бирга борганида, ака-укалар Д.М. ва Д.А.лар “ногирон укамни нега урасан” деб И.И. билан ўзаро тортишиб, уни уриб тан жароҳати етказишган.
Мазкур ҳолат Республика прокуратураси томонидан назоратга олиниб, Республика прокурорининг 29 апрель кунги қарори билан Жиноят кодексининг 277-моддаси 2-қисми “б” банди билан ҳолат юзасидан жиноят иши қўзғатилган.
“Жиноят иши тергови Қорақалпоғистон Республикаси Ички ишлар вазирлиги Тергов бошқармаси иш юритувига топширилди. Тергов натижасига кўра, ҳар иккала томоннинг ҳаракатларига қонуний баҳо берилиши таъминланади”, — дейилади хабарда.
