Андижонда ИИБ ходимидан қочишга уринган эркакнинг боши кесилиб кетди
Ҳолат бўйича расмийлар муносабат билдирди.
Андижонда ИИБ ходимларидан қочишга уринган маст фуқаро қўли ва боши кесилиб кетди. Ҳолат юзасидан вилоят ИИБ муносабат билдирди.
Ҳолат жорий йилининг 22 апрель куни соат 19:00 ларда юз берган. Асака тумани ИИБ профилактика инспектори Ф.А. Асака шаҳар Бобуршох кўчасидаги чорраҳада тез тиббий ёрдам машинасига йўл бермасдан ҳаракатланаётган Damas русумли автомашинани тўхтатиб, қоидабузарликни расмийлаштираётган вақтида автомашинада йўловчи сифатида кетаётган, маст ҳолатда бўлган фуқаро Ғ.А. ходимнинг ҳаракатларига кескин қаршилик кўрсатиб, уни уятли сўзлар билан ҳақоратлаган ва жамоат тартибини бузган.
Пост-патруль хизмати ходимлари томонидан жамоат тартибини бузаётган Ғ.А.ни ИИБга етказиш вақтида у ходимларидан қочишга уриниб, шу кўчада жойлашган “Совғалар” номли дўконга кириб, дўкон ичкари хонасидаги эшикни ортидан тираб олишга ҳаракат қилган. Шу вақтда эшик ойнаси синиб, Ғ.А.нинг боши ва чап қўлининг билак қисми кесилиб кетган.
Ортидан етиб келган ходимлар томонидан фуқаро Ғ.А. шифохонага етказилиб, унга “Чап қўл билак юқори учлиги тирсак бўғими ички иза соҳаси 14х5 см кесилиши оқибатида мускул, пой, қон-томир ва нерв шикастланиши, бош қисми чап томон чакка соҳасини кесилган жароҳати, кучли мастлик ҳолати” ташхиси қўйилган.
Ҳозирда ҳолат юзасидан туман прокуратураси томонидан терговга қадар текширув олиб борилмоқда.
