Сурхондарёда ИИБ ходими фуқарони уриб, оғзини боғлаб қўйди
Ҳолат юзасидан расмийлар тушунтириш берди.
Ижтимоий тармоқларда Сурхондарё вилоятининг Музработ туманида фуқарога ИИБ ходими томонидан куч ишлатилгани акс этган видео тарқалди. Ҳолат юзасидан вилоят ИИБ расмий муносабат билдирди.
Жорий йил 6 майдан 7 май кунига ўтар кечаси соат 01:10 ларда Музработ тумани «Шаффоф» маҳалласида яшовчи фуқаро С.С. исмли аёл туман ИИБ навбатчилик қисмига қўнғироқ қилиб, яшаш уйига нотаниш шахс келиб кўп марта эшигини тепиб жанжал қилаётганлиги ҳақидаги мурожаат қилган. Шу куни тунги хизматга жалб қилинган ИИБ ходими M.A. чақирилган манзилга борганда фуқаро У.П. кучли мастлик ҳолатида ИИБ ходимининг қонуний талабини бажармагани учун уни туман Тиббиёт марказида ташкил этилган Алкоголь мастлик ҳолатидаги шахсларга тиббий ёрдам кўрсатиш туманлараро пунктига олиб борган. Тиббиёт бирлашмасида ҳам даволанаётган беморларнинг тинчлигини бузиб, қонуний талабларга бўйсунмасдан, қўпол сўзлар билан ҳақоратлашда давом этган. Шундан сўнг У.П.ни тинчлантириш мақсадида ИИБ ходими қатъий ҳаракат қилган.
“Ходимнинг ҳаракатлари юзасидан ҳозирда Сурхондарё вилоят ИИБ масъуллари томонидан хизмат текшируви ўтказилаётганлигини маълум қиламиз”, — дейилади хабарда.
