Қорақалпоғистонда мактаб ўқувчиларига берилаётган бепул озиқ-овқат маҳсулотлари орасидан дори чиққани айтилди

 

Ижтимоий тармоқларида Қорақалпоғистонда кейтеринг усулида етказиб берилган озиқ-овқат маҳсулотлари ичидан таблетка кўринишида дори воситалари чиққани ҳақида хабар тарқалди. Ҳолат юзасидан республика прокуратураси расмий баёнот берди.

 

Маълум бўлишича, бир гуруҳ шахслар кейтеринг усулида озиқ-овқат таъминотини амалга ошираётган тадбиркорларга нисбатан туҳмат уюштириш орқали уларни обрўсизлантириш мақсадида 3 та ҳолатда ичига дори воситалари жойлаштирилган булка ва пряник маҳсулоти гўёки Элликқалъа ва Беруний туманларидаги таъминотчилар томонидан тарқатилгани ҳақидаги иддаолар билан “ANTIKORRUPSIYA” телеграмм каналига рўйи-рост асоссиз ва нохолис маълумотлар жойлаштирилишига эришиб, тадбиркорлик субъектларининг ишбилармонлик нуфузига путур етказишган.

 

Ҳозирда мазкур ҳолат юзасидан Жиноят кодексининг 139-моддаси 3-қисми “г” банди (Туҳмат) ва 192-моддаси (Рақобатчини обрўсизлантириш) билан жиноят иши қўзғатилган. Жиноят иши тергови якунига кўра, айбдор шахсларнинг жавобгарлик масаласи ҳал этилади.

 

“Бундан ташқари, кейтеринг усулида озиқ-овқат маҳсулотларини тарқатишда озиқ-овқат хавфсизлигини таъминлаш барча масъул идоралар эътиборида ва ушбу соҳада қонунийликни таъминлашнинг барча чоралари кўриб борилади”, —дейилади хабарда.