Жиззахда ҳокимлик юристи пора билан ушланди
У аввал ҳам жиноий жавобгарликка тортилган.
Жиззах вилоятидаги туман ҳокимликларидан бирининг юристконсульти пора билан қўлга олинди, дея хабар бермоқда “Янги Ўзбекистон” нашри.
Қайд этилишича, юрисконсульт хизмат мавқеидан фойдаланган ҳолда ўз ваколатига кирмаслигини била туриб, чорвачилик ва балиқчиликка ихтисослашган фермер хўжаликнинг бошқаруви бўйича юзага келган муаммони танишлари орқали мазкур хўжаликнинг қонуний раҳбари фойдасига ҳал қилиб бериш эвазига 5 минг АҚШ доллари талаб қилган. Шундан сўнг у олдиндан 3 минг АҚШ доллари олган вақтида Давлат хавфсизлик хизмати ходимлари томонидан ушланган.
Таъкидланишича, у муқаддам Жиноят Кодексининг 210-моддаси билан судланиб, жиноий жавобгарликка тортилган бўлсада, ўз хатосидан тўғри хулоса чиқармаган. Ҳозирда мазкур шахсга нисбатан Жиноят Кодексининг 25,168-моддаси ва 28,211-моддаси билан жиноят иши қўзғатилган.
