Самарқанд «Яшил шаҳарлар»дан дастлабкиси бўлди
Бу бўйича Ўзбекистон ва EТТБ ўртасида суверен кредит ажратиш тўғрисида Битим имзоланди.
EТТБ Бошқарувчилар Кенгашининг 32 йиллик йиғилишининг 2-кунида Ўзбекистон ҳукумати ва EТТБ ўртасида Самарқанд шаҳрида электробуслар қатновини йўлга қўйиш учун 49 миллион долларгача миқдорда суверен кредит ажратиш тўғрисида Битим имзоланди.
Ажратилган маблағ зарядловчи қурилмалар билан бирга 100 га яқин ўрта ўлчамдаги (10,5 м) электробусларни сотиб олиш, шунингдек, электравтобуслар парки, электр станцияси, фойдаланиш учун маъмурий бинолар ва техник хизмат кўрсатиш объектларини ўз ичига олган зарур инфратузилмани яратиш учун ишлатилади.
Бу "Самарқанд - яшил шаҳар" ҳаракат режасидаги биринчи лойиҳа бўлиб, барқарор ривожланиш истиқболлари ва стратегик мақсадларни ҳамда устувор экологик муаммоларни ҳал қилиш учун зарур бўлган ҳаракатлар ва инвестицияларни жалб қилишга ёрдам берадиган муҳим қадамдир.
