Шавкат Мирзиёев Самарқандда Франция тараққиёт агентлиги бош ижрочи директорини қабул қилди
Хабарингиз бор, Самарқандда Европа тикланиш ва тараққиёт банки Бошқарувчилар кенгашининг йиллик йиғилиши бўлиб ўтмоқда.
Бугун Президент Шавкат Мирзиёев Франция тараққиёт агентлиги бош ижрочи директори Реми Риуни қабул қилди.
Янги Шериклик дастури ва "йўл харитаси" доирасида Франция тараққиёт агентлиги билан кўп қиррали ҳамкорликни кенгайтиришнинг амалий жиҳатлари кўриб чиқилди.
Бугунги кунда Ўзбекистон агентликнинг етакчи ҳамкоридир. Хусусан, "Яшил" иқтисодиёт, коммунал соҳани, шу жумладан сув таъминоти тармоқларини модернизация қилиш, энергетика инфратузилмасини ривожлантириш, чорвачилик ва бошқа йўналишларда лойиҳалар амалга оширилмоқда. Қўшма лойиҳалар портфели ўтган йилда ўттиз фоизга ошиб, ҳозирда 1,3 миллиард долларни ташкил қилмоқда.
Учрашувда бизнесни қўллаб-қувватлаш дастурларини илгари суриш, давлат-хусусий шерикликнинг самарали механизмларини жорий этиш, агентликнинг “PROPARKO” ва “Ekspertiz Frans” тузилмалари билан ҳамкорлик қилиш масалалари муҳокама марказида бўлди.
