ЕТТБ Uzbekistan Airports АЖга салкам 30 млн евро ажратади
Ушбу маблағ эвазига 76 дона янги аэропорт махсус техникалари харид қилиниши айтилмоқда.
Европа тикланиш ва тараққиёт банки (ЕТТБ) Uzbekistan Airports АЖга Ўзбекистон халқаро аэропортларида аэропорт ускуналарини модернизация қилиш учун 28 миллион еврогача бўлган узоқ муддатли молиялаштиришни тақдим этади. Бу ҳақда Uzbekistan Airports АЖ Ахборот хизмати хабар берди.
ЕТТБнинг Самарқанд шаҳрида бўлиб ўтган йиллик форумида томонлар илгари эришилган келишувларни мустаҳкамлади. Форум доирасида Uzbekistan Airports АЖ бошқаруви раиси Раъно Жўраева ва Евроосиё бўйича инфратузилма департаменти директори Екатерина Мирошник мандат хатлари билан алишдилар.
"Банк маблағлари ҳисобидан йўловчи ташувчи автобуслар, юк ташувчи техникалар, лентали юк узатувчилар, самолёт буксирлари, самолётларни сув билан тўлдириш ва ҳожатхона бўлимларига хизмат кўрсатиш учун махсус автомашиналар, амбулатор автолифтлар, тозаловчи, муздан тозалаш машиналари ва бошқалар харид қилинади. Дастлабки ҳисоб-китобларга кўра, ЕТТБнинг молиялаштириши эвазига 76 дона янги аэропорт махсус техникалари харид қилинади", — деди Uzbekistan Airports АЖ бошқаруви раиси Раъно Жўраева.
Бундан ташқари, ЕТТБ ва Uzbekistan Airports ўртасида 1 миллион евродан ортиқ грант маблағларини ажратиш бўйича келишувларга эришилди. Бунинг бир қисми сифатида банк асосий бизнес-жараёнларни оптималлаштириш ва шу орқали Uzbekistan Airports ва унинг таркибий бўлинмалари фаолияти самарадорлигини оширишга ёрдам берадиган халқаро консалтинг компаниясини жалб қилишни кўзда тутади. Шуниси эътиборга лойиқки, бу Ўзбекистонда, молиялаштириш мамлакат ҳукумати томонидан давлат кафолатисиз амалга ошириладиган давлат компанияси билан ҳамкорликнинг биринчи намунаси бўлади.
