Фарғонада суд-экспертизаси 3 жойидан пичоқланган фуқарога “енгил тан жароҳати” хулосасини берди
Ҳолат юзасидан расмийлар муносабат билдирди.
Ижтимоий тармоқларда Фарғона вилоятида экспертизанинг енгил тан жароҳати хулосасидан норози бўлган фуқаро ҳақида хабарлар тарқалди. Ҳолат юзасидан вилоят ИИБ расмий муносабат билдирди.
Маълум бўлишича, 2023 йилда 21 апрель куни фуқаро Б.Т. Қува тумани Бегат қишлоғи марказида фуқаро А.А. билан келишмовчилик сабабли жанжаллашиб, Б.Т. ёнидаги ошхона пичоғи билан А.А.нинг ўнг ва чап сон ҳамда қорин қисмига қасддан уриб тан жароҳати етказган.
Туман тиббиёт бўлимининг дастлабки хулосасига асосан туман ИИБ ҳузуридаги тергов бўлинмаси томонидан Жиноят кодексининг 105-моддаси 2-қисми “м” банди билан жиноят иши қўзғатилган.
Тайинланган судга оид экспертиза хулосасида жанжалга аралашган 4 нафар фуқароларда 6 кундан кўп давом этмайдиган, фуқаро А.А.да қорин, кўкрак, ўнг ва чап сон, ёнбош соҳаларида кесилган яралар аниқланиб, 21 кундан кўп бўлмаган муддатга соғлиғини бузилишига сабаб бўлувчи енгил тан жароҳатлари кўрсатилган.
Фуқаро А.А экспертнинг мазкур хулосасига эътироз билдирганлиги сабабли Судга оид қайта тиббий экспертиза тайинланиб ижро этишлик учун Андижон вилоятига юборилган.
Ҳозирда мазкур ҳолат юзасидан дастлабки тергов ҳаракатлари олиб борилмоқда.
