Робахон Махмудованинг номзоди Ўзбекистон президентлигига тасдиқланди

Ўзбекистон «Адолат» социал-демократик партиясининг 29 май куни bo‘lib ўтган навбатдан ташқари қурултойида Ўзбекистон президентлигига Ўзбекистон «Адолат» социал-демократик партиясидан номзод кўрсатиш тўғрисидаги масала атрофлича муҳокама қилинди. Бу ҳақда партия ахборот хизмати хабар берди.

 

Қурултойда делегатлар Ўзбекистон президентлигига Махмудова Робахон Анваровнанинг номзодини қўллаб-қуввватлади. Хусусан, Ўзбекистон президентлигига «Адолат» социал-демократик партиясининг номзоди Робахон Махмудова ўз сайловолди дастурининг мақсад ва вазифалари, устувор йўналишларини қурултой қатнашчилари эътиборига ҳавола этди.

 

Хусусан, номзод ўз сайловолди дастурида Ўзбекистон тараққиёти йўлида ҳуқуқий демократик, ижтимоий давлат ва барча учун фаровонлик таъминланган адолатли фуқаролик жамияти қуришнинг социал-демократик моделини таклиф этди. Шунингдек, номзоднинг дастурида инсон, унинг ҳуқуқлари, эркинликлари ва қонуний манфаатлари давлат ва жамиятнинг энг юксак қадриятлари эканлиги тан олиниб, жамият ва давлат ҳаётининг барча жабҳаларида ҳар бир инсоннинг фаровон ҳаёт кечириши учун зарур шарт-шароитлар яратиш, ижтимоий адолат ва қонун устуворлигини таъминлаш, Ўзбекистоннинг эркинлик, имкониятлар тенглиги, адолатлилик, бирдамлик, ижтимоий ҳимоя ва масъулият тамойиллари ҳукмронлик қиладиган, инсонларнинг кескин табақаланишига йўл қўйилмайдиган кучли ижтимоий давлат сифатида, аҳолининг юқори турмуш даражасига эга ривожланган давлатлар қаторига қўшилишига эришиш каби вазифа ва мақсадларга алоҳида эътибор қаратилгани маълум қилинди.