Ўзбекистонда ички ёнув двигателли енгил автомобиллар сотуви тақиқланиши мумкин
Шунингдек, электрон сигаретларни мамлакатга олиб киришни таъқиқлаш таклиф қилинди.
Ўзбекистон Экологик партиясидан президентликка номзод Абдушукур Хамзаев ички ёнув двигателли енгил автомобилларни сотувини тақиқлашни таклиф қилди. Бу ҳақда у партия Марказий Кенгашининг пленумида айтиб ўтди.
Абдушукур Хамзаев ўзининг сайловолди дастури доирасида 2030 йилдан бошлаб Ўзбекистонда ички ёнув двигателли енгил автомобилларни сотишни ҳамда четда олиб киришни таъқиқлаш каби ташаббусларни илгари сурди.
Шунингдек, у ижтимоий соҳада давлат стоматологик клиникаларини ривожлантириш, шаҳарлар бош режаларини тузишда камида 30 фоизли яшил майдонлар яратиш талабини мустаҳкамлаш, шаҳарсозлик фаолиятида жамоатчилик назоратини кучайтириш, норматив ҳужжатларни қабул қилишда атроф-муҳитга таъсирини баҳолаш тизимини жорий этиш, бир марталик ишлатиладиган пластик ва полиетилен таркибли идишлардан фойдаланишдан босқичма-босқич воз кечиш ҳамда электрон сигаретларни мамлакатга олиб киришни таъқиқлашни ҳам таклиф қилди.
Бундан ташқари, номзоднинг сайловолди дастурида пестицидлардан фойдаланишдан воз кечишга йўналтирилган «Яшил Ўзбекистон – 2030» дастурини ишлаб чиқиш ҳамда юк ташишни йирик машиналардан темир йўлларга ўзгартиришга қаратилган чоралар таъкидланди.
