Ёш киноижодкорлар «Олтин рицар»да энг кўп мукофотни қўлга киритди
Чеченистонда ўтказилган халқаро кинофорумда дунёнинг 60 мамлакатидан 10 мингдан ортиқ ижодкор иштирок этди.
Жорий йилнинг 24-31 май кунлари Чеченистон Республикаси Грозний шаҳрида «Олтин рицар» («Золотой Витяз») ХХХII халқаро кинофоруми бўлиб ўтди.
Ўзининг 32 йиллик фаолияти давомида «Олтин рицар» кинофоруми Россия, Белорус, Украина, Сербия, Болгария, Молдова, Босния ва Гертсеговинада кинематография, театр, адабиёт, мусиқа ва тасвирий санъат бўйича юздан ортиқ кенг кўламли форумлар ўтказди. “Олтин рицар” тадбирларида дунёнинг 60 мамлакатидан 10 мингдан ортиқ ижодкор иштирок этди.
«Олтин рицар» ХХХII халқаро кинофорумида 153 та ва танловдан ташқари дунёнинг 20 мамлакатидан, шу жумладан Россия, Арманистон, Белорусия, Буюк Британия, Германия, Исроил, Эрон, Иордания, Испания, Қозоғистон, Канада, Қирғизистон, Сербия Республикаси, Руминия, Туркия, Ўзбекистон, Украина, Франция, Швейцариядан 12 та бадиий, ҳужжатли, анимацион, дебют, талабалар ва болалар фильмлари иштирок этди.
Кинофорумда халқаро ҳакамлар ҳайъати таркибига Россия, Беларус, Аргентина, Болгария, Германия, Испания, Эрон, Қирғизистон, Шимолий Македония, Сербия ва Туркиянинг энг йирик экспертлари киритилган.
Танловдан ташқари, форум доирасида таниқли киноижодкорлар иштирокидаги фильмлар премьералари, уларнинг томошабинлар билан муҳокамалари, фильмлар ретроспективлари, илмий конференция, бир қатор киномактаблар билан ижодий учрашувлар ва маҳорат дарслари ташкил этилди.
Киномактаб ва илмий конференцияда Ўзбекистондан санъатшунослик фанлари фалсафа доктори, Истанбул кино академияси фахрий академиги, Тошкент шаҳридаги Бутунроссия давлат кинематография институти филиали директори Элдар Юлдашев иштирок этди.
Бу йилги танлов дастурида Ўзбекистондан Тошкент шаҳридаги Бутунроссия давлат кинематография институти филиали талабаларининг 4 та фильми иштирок этди. Булар орасида талабаларнинг дебют ишлари, қисқа метражли, ҳужжатли ва тўлиқ метражли фильмлари ҳам бор эди.
Ёш ўзбек киноижодкорларининг фильмлари мукофотлар сони бўйича биринчи ўринни эгаллади. «Инсон», «Саробга йўл» ва «Скотч» фильмлари ҳакамлар ҳайъатининг алоҳида мукофотларига сазовор бўлди. Шунингдек, «Скотч» фильми энг яхши дебют фильм сифатида бронза дипломига ҳам сазовор бўлди.
Ҳакамлар ҳайъати раиси, «Ника» киноакадемияси Президенти Андрей Кончаловский «Бу кўрсаткич ўзбек киносининг янги тўлқинидан далолат беради», дея таъкидлади.
Таъкидлаб ўтиш жоизки, илгари ушбу фильмлар бошқа нуфузли халқаро кинофестивалларда ҳам юқори баҳоланган эди.
