Жиззахда салкам 1 тонна сифатсиз гўшт аниқланди
У Қашқадарёдан Тошкентга олиб кетилаётган бўлган.
Жиззах вилоятининг Ғаллаорол туманида 3 июнь куни Қашқадарёдан Тошкентга сотиш мақсадида олиб кетилаётган салкам 1 тонна сифатсиз гўшт тўхтатиб қолинди. Бу ҳақда вилоят ИИБ хабар бермоқда.
Ғаллаорол тумани ҳудудидаги «Сангзор-15» йўл-патруль хизмати масканида Қашқадарё-Тошкент йўналишида шубҳали ҳаракатланган Cobalt тўхтатилиб, текширилган. Текширув давомида Қашқадарё вилояти Чироқчи туманида яшовчи 1982 йилда туғилган фуқаро Э.T. бошқарувидаги автоуловнинг юкхона ва салонида гўшт маҳсулотлари ветеринария-санитария қоидаларига зид равишда олиб кетилаётгани аниқланган. Ҳайдовчи ушбу гўшт маҳсулотларига оид ҳеч қандай ҳужжатни тақдим эта олмаган. Аммо Э.T. гўштни Қашқадарё вилоятидан Тошкент шаҳрига сотиш мақсадида олиб кетаётганини маълум қилган.
Тадбир жараёнида соҳа ходимлари томонидан жами 820 килограмм гўшт маҳсулотлари ҳужжатлаштириб олинган. Унинг истеъмолга яроқлилигини текшириш мақсадида вақтинча музхонага жойлаштирилган. Бироқ лаборатория текширувида гўшт маҳсулотининг истеъмолга яроқсизли ойдинлашди. Шундан сўнг ушбу гўшт маҳсулоти тегишли тартибда ёқиб йўқ қилинди.
