Қорақалпоғистонда Қизил китобга киритилган буғу отиб ўлдирилди
Жониворни ноқонуний овлаш оқибатида табиатга 99 млн сўм зарар етказилган.
Қорақалпоғистондаги Қуйи Амударё биосфера резервати инспекторлари томонидан 11 июнь куни халқаро ва Ўзбекистон Қизил китобига киритилган Бухоро буғусини ноқонуний овлаган браконер қўлга олинди.
Аниқланишича, Қуйи Амударё давлат биосфера резервати инспекторларига 11 июнь куни ҳудудда ўқ овози эшитилганлиги тўғрисида хабар келиб тушган. Инспекторлар воқеа жойига етиб боришганида оқ рангли Matiz ҳудуддан чиқиб кетганлиги аниқланган.
Шундан сўнг машина изидан қувиб, Гурлан туманигача борган инспекторлар браконерни қўлга олган. Ҳуқуқбузарнинг машинаси кўздан кечирилганда Бухоро буғусининг бўлакланган жасади топилган. Гумонланувчининг ёнидан процессуал тартибда икки дона ов милтиғи, бир дона Бухоро буғуси тана қисмлари расмийлаштириб олинган.
Бухоро буғусини ноқонуний овлаш орқали ҳуқуқбузар томонидан табиатга 99 миллион сўм зарар етказилган. Ҳозирда мазкур ҳолат юзасидан суриштирув ишлари олиб борилмоқда.
