Қўқон бозоридаги ёнғин бўйича жиноят иши қўзғатилди
Бу ҳақда Бош прокуратура матбуот котиби хабар берди.
Бош прокуратура матбуот котиби Ҳаёт Шамсуддиновнинг маълум қилишича, Қўқондаги савдо комплексларида содир бўлган ёнғин бўйича Жиноят кодексининг 259-моддаси (Ёнғин хавфсизлиги қоидаларини бузиш) билан жиноят иши қўзғатилди.
«Ҳозирда Фарғона вилояти ИИБ ҳузуридаги Тергов бошқармаси томонидан тергов ҳаракатлари олиб борилмоқда», — дейилади хабарда.
Эслатиб ўтамиз, Фавқулодда вазиятлар вазирлигига кўра, Қўқон шаҳридаги «Буюк Ипак йўли» бозоридаги ёнғин ҳақида душанба куни соат 19:17 да хабар келиб тушган. 10 та ёнғин-қутқарув экипажи соат 19:25 да воқеа жойига етиб бориб, ёнғин ўчиришга киришган.
Жабрланган ҳақида маълумот эълон қилинмаяпти. Соат 20:37 да ФВВ ёнғин қуршаб олингани ва уни тўлиқ бартараф этиш чоралари кўрилаётганини маълум қилди. Соат 23:12 да вазирлик ёнғинни ўчириш жараёни акс этган лавҳаларни эълон қилди.
.
