Тошкентда она ва бола 39 ёшли эркакни «самосуд» қилди
Бир неча кун ертўлада ўтирган эркак орадан 18 кун ўтиб, ички ишлар органларига хабар берган.
Тошкент шаҳар Миробод туманида она ва бола 39 ёшли эркакни «самосуд» қилиб, қўлларини боғлаган ҳолда омборга қамаб қўйди. ИИББ ҳолат юзасидан маълумот берди.
Маълум бўлишича, ушбу шахс хонадон эгаларига бундан 2 йил илгари Республика кадастр агентлигида ишловчи таниши орқали уларнинг уйига кадастр ҳужжатларини тўғрилаб беришини айтиб, 1000 доллар олган. Аммо шу кунгача ҳужжатларни ҳам қилиб бермаган, пулни ҳам қайтармаган.
Ушбу эркакдан пулларни қайтариб олиш мақсадида она-ўғил уни уйга чақирган ва чап елкасига пичоқ билан жароҳат етказган. Аёл уни темир арматура билан ҳам урган. Шундан сўнг эркакни уй ертўласига олиб тушиб, стулга оёқ-қўлларини скотч ва сим ёрдамида боғлаган, бир кеча шу ҳолатда қолдирган.
Эркак пулларни қайтарсагина уни қўйиб юборишларини айтган хонадон эгалари унинг турмуш ўртоғига қўнғироқ қилдирган. Рафиқасидан 300 доллар ва 700 долларга тенг бир жуфт тилла зирак ва бир дона тилла узукни олиб келиб беришгач, уни қўйиб юборишган.
Эркак орадан 18 кун ўтгач бу воқеа ҳақида ички ишлар органларига хабар берган. Мазкур ҳолат юзасидан Жиноят кодексининг 165-моддаси ҳамда 138-моддасининг тегишли бандлари билан жиноят иши қўзғатилган.
