Хитойлик журналист “Олтин қалам” олди
Унга Ўзбекистон элчихонасида мукофот топширилган.
Ўзбекистоннинг Пекиндаги элчихонасида шу йил ўтказилган “Олтин қалам” XVII миллий мукофоти учун халқаро танловнинг “Чет эллик журналистнинг Ўзбекистон ҳақидаги энг яхши материали учун” номинациясида биринчи ўринга сазовор бўлган Хитойнинг “Жэньмин хуабао” нашриёти муҳаррири Сан Хаоянгга мукофот статуэткаси, дипломи ҳамда пул мукофоти тантанали равишда топширилди. Бу ҳақда “Дунё” ахборот агентлиги хабар бермоқда.
Маросимда сўз олган Ўзбекистон журналистлар уюшмаси раиси вазифасини бажарувчи Холмурод Салимов бу йилги танлов давлат раҳбари Шавкат Мирзиёевнинг 2022 йил 27 июндаги “Оммавий ахборот воситаларини қўллаб-қувватлаш ва журналистика соҳасини ривожлантириш чора-тадбирлари тўғрисида”ги қарори ижроси доирасида демократик тамойиллар асосида янада очиқ ва шаффоф ташкил этилгани, унда дунёнинг 25 давлатидан 50 нафардан зиёд хорижлик журналистлар қатнашганини алоҳида таъкидлади. Шунингдек, мамлакатда барча соҳаларда амалга оширилаётган кенг кўламли ислоҳотлар ҳақида ҳам атрофлича маълумотлар тақдим этилди.
Тадбирда икки мамлакат оммавий ахборот воситалари ўртасида ўзаро ҳамкорликни ривожлантириш, тажриба алмашишни таъминлаш каби масалалар хусусида фикр юритилди.
“Кейинги йилларда Ўзбекистонда жадал олиб борилаётган ислоҳотлар билан танишиш баробарида уларни Хитой оммавий ахборот воситаларида ёритилишига ҳам ҳисса қўшиб келмоқдаман. Ҳар қандай инсон муваффақиятга эришса, қувонгани сингари юқори нуфузли “Олтин қалам” халқаро танловида ғолиб бўлганимдан беҳад мамнун бўлдим. Бундан кейин ҳам Ўзбекистон ҳақида турли мавзуларга бағишланган материаллар тайёрлашни ўз олдимга мақсад қилиб қўйганман”, — деди Сан Хаоянг.
