Сирдарёда салкам 1 тонна сифатсиз гўшт аниқланди
У Самарқанд–Тошкент йўналишида тўхтатиб қолинган.
Сирдарёда 1 тоннага яқин истеъмолга яроқсиз гўшт аниқланди, дея хабар бермоқда вилоят ИИБ ахборот хизмати.
Қайд этилишича, «Сирдарё» ЙПХ масканида мутасадди ташкилотлар ходимлари билан ҳамкорликда тадбир ўтказилган. Тадбир давомида Самарқанд–Тошкент йўналишида ҳаракатланиб келаётган ИСУЗУ русумли автотранспорт воситаси холислар иштирокида тўхтатилиб текширилган.
Аниқланишича, Самарқанд вилояти Каттақўрғон туманида яшовчи фуқаро X.Sh. автотранспорт юкхонасида ҳеч қандай ҳужжатларсиз, келиб чиқиши номаълум бўлган 941 кг ҳайвон гўштини олиб кетаётган бўлган.
Ҳозирда аниқланган ҳолат юзасидан Сирдарё вилояти ИИБ Тезкор қидирув хизмати Жиноят қидирув бошқармаси масъул ходимлари томонидан суриштирув ҳаракатлари олиб борилмоқда.
