Қашқадарё телевидениеси мансабдорларига нисбатан жиноят иши қўзғатилди
Улар 81 млн сўм гонорарни ортиқча тўлаганликда айбланмоқда.
Вилоят прокурорининг фуқаро мурожаатига жавобан йўллаган жавоб хатида ёзилишича, TB мансабдорлари Жиноят кодексининг 167-моддаси «в», «г» бандлари (бир гуруҳ шахслар томонидан олдиндан тил бириктириб, ўзлаштириш ёки растрата йўли билан талон-торож қилиш) (мансаб мавқеини суиистеъмол қилиш йўли билан талон-торож қилиш) ҳамда 209-модда 1-қисми (мансаб сохтакорлиги) билан айбланмоқда.
«Мурожаатингиз юзасидан мутахассислар иштирокида ўтказилган қайта ўрганишда муассасада жами 81 миллион 500 минг сўм муаллифлик ҳақи, иш ҳақи ва бошқа тўловлар ноқонуний тўланиб, бюджет маблағлари талон-торож қилинганлиги аниқланди», — дейилади Қашқадарё прокурорининг мурожаатчи Инобат Абдуллаевга йўллаган жавоб хатида.
Инобат Абдуллаеванинг маълум қилишича, прокуратура аниқлаган 81 миллион 500 минг сўм миқдоридаги гонорар телевидение бош муҳаррири ҳамда бир нафар журналист учун ёзилган ноқонуний гонорар миқдори ҳисобланади.
«Бу ҳали икки кишига ёзилган ноқоунуний гонорар миқдори. Телевидениеда ишлаётганларга ёзилаётган ноқонуний гонорарларни ҳисоб-китоб қилса, қанча миқдордаги бюджет пули ноқонуний тўланганини билиб олиш мумкин. Прокуратура текширув жараёнларини давом эттиришидан, давлат пуллари талон-торож қилинаётганини фош этишидан умидворман», — дейди журналист.
Шунингдек, журналистнинг аниқлик киритишича, Қашқадарё TBга бир йилда гонорарлар учун бюджетдан 2 миллиард сўм маблағ ажратилади.
