Наманганда 4 туп дарахтни кесган фуқаро 2 йилга қамалди
Шунингдек, айбланувчи 400 миллион сўмга яқин жарима ҳам тўлайди
Жиноят ишлари бўйича Наманган туман судида 4 туп қимматбаҳо садақайрағоч дарахтини кесган Б.M.гa ҳукм ўқилди. Унга нисбатан 2 йил муддатга озодликни чеклаш жазоси ва 326 850 000 сўм зарарни ундириш белгиланди.
Қайд этилишича, жорий йилнинг 2-март куни Наманган туманида фуқаро Б.М. томонидан ёши 100 йилдан кам бўлган 4 туп қимматбаҳо садақайрағоч дарахти кесиб юборилганлиги ва бу орқали ўсимлик дунёсига 326 850 000 сўм миқдорида зарар етказилганлиги аниқланди.
Натижада фуқаронинг ҳаракатларида жиноят аломатлари борлиги сабабли иш ҳужжатларига ҳуқуқий баҳо бериш учун туман прокуратурасига юборилган. Шунингдек, туман прокуратураси томонидан Б.M.гa оид иш ҳужжатлари ўрганилиб, унга нисбатан Жиноят кодексининг 198-моддасининг 2-қисми билан жиноят иши қўзғатилган ва жиноят ишини мазмунан кўриб чиқиш учун Жиноят ишлари бўйича Наманган туман судига юборилади.
Оқибатда айбланувчи Жиноят кодексининг 198-моддаси 2-қисми билан айбдор деб топилиб, унга нисбатан 2 йил муддатга озодликни чеклаш жазоси тайинланди. Шунингдек, Б.М.дан Наманган вилоят Экология бошқармаси фойдасига ўсимлик дунёсига етказилган 326 850 000 сўм зарарни ундириш белгиланди.
