Чотқол давлат қўриқхонасида юз берган ёнғин 6 соатда ўчирилди
20 гектарга яқин ҳудудда содир бўлган ёнғинни ўчириш учун Мудофаа, Ички ишлар вазирликлари ва ДХХ чегара қўшинлари ҳам жалб этилди
Аввалроқ 11 июль куни соат 14:00 лар атрофида Тошкент вилоятининг Бўстонлиқ туманида жойлашган Чотқол давлат биосфера қўриқхонасининг 10 гектардан 20 гектаргача бўлган Майдонтол ва Лайлакчи бўлимлари ҳудудида ёнғин содир бўлгани ҳақида хабар берилганди.
ФВВ хабарига кўра, ёнғин 11 июль куни соат 20:00 да тўлиқ бартараф этилган.
Қайд этилишича, ёнғинни бартараф этишга Фавқулодда вазиятлар вазирлигининг Ўрмон ёнғинларини бартараф этиш бўйича махсус отряди ходимлари, Мудофаа, Ички ишлар, Экология, атроф-муҳитни муҳофаза қилиш ва иқлим ўзгариши вазирликлари, ДХХ Чегара қўшинлари ва туман ФВДТ қуйи тизимига кирувчи хизматлар куч ва воситалари жалб этилган.
