Қозоғистонда блогерларга рекламадан солиқ тўлаш мажбурияти юкланди

 

Қозоғистон президенти Қосим-Жўмарт Тўқаев интернет-платформалар ва онлайн рекламани тартибга солувчи қонунни имзолади, дея хабар бермоқда «Курсив». Ҳужжат блогерларни юридик шахс сифатида рўйхатдан ўтиш ва ёлғон маълумотлар учун жавобгарликка тортишни тартибини белгилайди.

 

Қонунда «инфлюенсер (блогер)», «онлайн платформа», «ҳомийлик контенти», «жамоат ҳамжамияти» ва бошқа тушунчалар киритилган. Блогерлар реклама остидаги постларни белгилаши ва даромаддан солиқ тўлаши керак бўлади. 

 

Бундан ташқари, қонунда ёлғон маълумот тарқатганлик учун маъмурий жавобгарлик назарда тутилган. Жисмоний шахслар учун жарима миқдори 69 минг тенгени (тахминан 155 доллар), блогер-тадбиркорлар учун эса 138 минг тенгени (300 доллардан сал кўпроқ) ташкил этади. 

 

Қозоғистонда ёлғон маълумот тарқатганлик учун аллақачон жиноий жавобгарлик, жумладан, катта миқдорда жарима тўлаш назарда тутилган. Мамлакат Бош прокуратурасида таъкидланганидек, маъмурий жавобгарликнинг жорий этилиши «ўта оғир жиноятлар профилактикаси» вазифасини ўтайди. 

 

Қонун шунингдек, қозоқ тилини онлайн платформалар интерфейсларига интеграциялашни назарда тутади, бу эса тартибга солувчи органларга нафақат ноқонуний контентни кузатиш, балки уни олиб ташлашни талаб қилиш имконини беради. Агар бу талаб бажарилмаса, расмийлар интернет-платформа фаолиятини чеклаш ҳуқуқига эга бўлади. 

 

Қозоғистон ахборот ва ижтимоий ривожланиш вазири Дархон Қидирали сўзларига кўра, янги қонун яширин иқтисодиёт ва интернетдаги фирибгарликка қарши курашда ёрдам беради.

 

«Бошқача қилиб айтганда, офлайн ҳаётдаги масъулият онлайн дунёда ҳам талаб қилинади», — деди у.