Россиядаги айрим банкларнинг UnionPay карталари чет элда ишлашни тўхтатади

 

«Тинькофф банк» томонидан чиқарилган UnionPay карталари бугун, 21 июлдан бошлаб АҚШнинг банкка қарши санкциялари туфайли хорижда ишлашни тўхтатади. Бу ҳақда кредит ташкилотининг Telegram-каналида хабар берилди. 

 

Банк хориждаги мижозларига яқин келажакда нақд пул ечиб олишни маслаҳат бериб, Россияда карталар одатдагидек ишлашда давом этишини таъкидлади. «Тинькофф» вакиллари яқин орада тўлов тизимининг қарори туфайли UnionPay карталарини чиқариш тўхтатилишини қўшимча қилди. 

 

Россиянинг яна бир банки, АҚШнинг янги чеклов чораларига дучор бўлган — «Солидарность» ҳам Россиядан ташқаридаги мижозларга нақд пул олишни маслаҳат берди.

 

«Иккиламчи санкциялардан қўрқиб, айрим контрагент банклар хориждаги банкдан пул ўтказмаларини қабул қилиш имкониятини чеклаши мумкин», — дейилади хабарда.

 

Аввалроқ, 20 июль куни АҚШ Россиянинг бешта банкига қарши санкциялар жорий қилган эди. Рўйхатга «Тинькофф» ва «Солидарность»дан ташқари «Локо Банк», «Юнистрим» ҳамда Петербург ижтимоий тижорат банки кирди. Бундан ташқари, Вашингтон 18 нафар россиялик, жумладан Ҳисоб палатаси собиқ раҳбари Алексей Кудринга нисбатан чеклов чораларини қўллаган. Шунингдек, Россия Фанлар академиясининг тадқиқот марказлари ва институтлари, юк ва йўловчи кемалари, саноат ва мудофаа корхоналари ҳам санкциялар остида қолди. 

 

АҚШ Молия вазирлиги баёнотида айтилишича, янги чоралар Москванинг Украина урушини давом эттиришига имкон берувчи товарлардан фойдаланишини тўхтатиш, шунингдек, Россиянинг металлургия ва тоғ-кон саноатидан тушадиган даромадларини камайтириш, унинг келажакдаги энергетика имкониятларига путур етказиш ва халқаро молия тизимига киришини ёмонлаштириш учун мўлжалланган.