Тошкент вилоятида яшаш уйида «нарколаборатория» ташкил қилган шахслар ушланди
Текширув давомида хонадонда синтетик гиёҳвандлик воситалари ҳамда уларни тайёрлашда фойдаланилган техник воситалар борлиги аниқланган
Тошкент вилояти Ички ишлар бош бошқармасининг хабар беришича, 20 июль куни Олмалиқ шаҳрида яшовчи 40 ёшли фуқаро шаҳар ҳудудида гумонланиб текширилганда, унинг ёнидан 0,36 грамм «мефедрон» (экспертиза хулосаси) синтетик гиёҳвандлик воситаси борлиги аниқланиб далилий ашё сифатида ҳужжатлаштириб олинган.
Шундан сўнг тезкор тадбир давом эттирилиб, шахснинг яшаш хонадони кўздан кечирилган. Натижада хонадондан турли ҳажмдаги шиша ва бошқа идишларда кимёвий, ўткир ҳидли суюқликлар, ярим тайёр ва тайёр ҳолдаги синтетик гиёҳвандлик воситалари ҳамда уларни тайёрлашда фойдаланилган техник воситалар борлиги аниқланиб, ҳужжатлаштирилган.
Шунингдек, тадбир давомида ушбу воситаларни тайёрлашда иштирок этган 43 ёшли эркак ва 21 ёшли аёл ҳам қўлга олинган.
Ҳозирда ҳолат юзасидан ушланган шахсларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
