Президент Фарғонадаги «Янги Ўзбекистон» массиви қурилиши билан танишди
Бугунги кунда 300 гектарли майдонда жадал қурилиш кетмоқда
Шавкат Мирзиёев Фарғона шаҳридаги «Янги Ўзбекистон» массивининг қурилиш ишлари билан танишди.
Президент матбуот хизмати маълумотларига кўра, бугунги кунда 300 гектарли улкан майдонда жадал қурилиш кетмоқда. Бу ерда 65 мингдан зиёд аҳолига мўлжалланган 298 та кўп қаватли уй бунёд этилади.
«Аҳоли зич яшайдиган шаҳар ва вилоят учун бу муҳим ижтимоий аҳамиятга эга. Бу йил массивда 73 та уй барпо этилмоқда. Уларнинг дастлабкилари фойдаланишга топширилиб бўлди», — дейилади хабарда.
Мазкур ҳудудда мактаблар, мактабгача таълим ва тиббиёт муассасалари, савдо ва маиший хизмат шохобчалари, спорт мажмуаси бўлади.
«50 гектарда ташкил этиладиган кичик саноат зонаси аҳолини иш билан таъминлашда муҳим ўрин тутади. Массив ўзига хос экошаҳар бўлади - 70 гектар майдонда ’Янги Ўзбекистон боғиʼ ва сунъий кўл барпо қилинади. Бўш майдонларга ҳам дарахтлар экилади. Сунъий кўл атрофида сўлим хиёбон ташкил этилади», — дейилади хабарда.
Давлат раҳбари массивдаги ижтимоий-иқтисодий лойиҳаларга инвесторларни жалб этиш, хизмат турларини кўпайтириш бўйича кўрсатмалар берди. Шу билан президент Фарғона вилоятига ташрифини якунлаб, Тошкентга қайтиб келди.
