Фаррош Мессидан дастхат олгани учун ишдан бўшатилди
У «Интер Маями»нинг сўнгги ўйинида фаррошлик қилган.
«Интер Маями» стадионида ишлаган фаррош Лео Мессидан дастхат олгани учун ишдан бўшатилди. Бир ярим йилдан бери Маямида истиқомат қилаётган колумбиялик Кристиан Саламанка «Интер Маями» стадионидаги сўнгги ўйинда фаррош бўлиб ишлаган. Саламанка - спорт тадбирлари ва концертлар ўтадиган майдонларни тозалаш билан шуғулланадиган компания ходими. У Мессини кўриб, ундан дастхат сўраган ва бунинг учун уни ишдан бўшатишган.
«Автобуслар тўхтаб турган сектордаги ҳожатхоналарни тозалашим керак эди. Бахтимга, автобус тўхтаб, барча ўйинчилар тушишганида мен ташқарида эдим. Охиргиси Месси эди. Менга: «Ҳей, жаҳон чемпиони»! деб бақиришим кифоя эди. Ва у ўгирилиб қаради. Ишчи кўйлагимнинг тугмаларини ечдим, тагида Аргентина футболкаси бор эди. Шундан сўнг у дастхат ёзиб берди. Кейин хавфсизлик ходимлари пайдо бўлди, улар мени олиб чиқиб кетишди ва ишдан бўшатишди», - деди Кристиан.
Қайд этилишича, стадион ишчилари (клубда ёки ташқи компанияда ишлашидан қатъи назар) иш вақтида юлдузлар билан суратга тушмаслик ва уларнинг дастхатларини олмаслик ҳақида огоҳлантирилган.
