Ўзбекистонда қуёш панелларини ўрнатишда мажбурлов йўқлиги маълум қилинди
Энергетика вазирлиги қуёш панелларини давлат ташкилотларига, касалхона ва мактабларга, хусусий биноларга ўрнатиш монополияга айланиб қолганини рад этди.
Ижтимоий тармоқда қуёш панелларини давлат ташкилотларига, касалхона ва мактабларга, хусусий биноларга ўрнатиш монополияга айланиб қолгани ҳақида танқидий мақола чоп этилди. Энергетика ушбу хабарга муносабат билдирди.
Вазирлик хабарида айтилишича, мақолада билдирилган воқеалар аноним шахслар номидан баён этилган бўлиб, фактлар умуман ҳақиқатга тўғри келмайди.
«Бугунги кунда юртимизда кичик қувватли қуёш фотоэлектр тизимларини ўрнатиш давлат томонидан эмас, тадбиркорлик субъектлари (хусусий корхоналар) тарафидан амалга оширилади. Бугунги кунда республикамизда қуёш фотоэлектр тизимларини ва қуёш сув иситиш қурилмаларини ўрнатиш ҳамда уларга сервис хизмати кўрсатиш билан шуғулланувчи 100 дан зиёд тадбиркорлик субъектлари мавжуд», — дейилади вазирлик хабарида.
Маълум қилинишича, Ўзбекистондаги кичик қувватли қуёш фотоэлектр тизимлари қайсидир катта компаниялар билан боғланмаган, бири-биридан мустақил, рақобатга киришган ҳолда фаолият юритади.
Унга кўра, хориждан қуёш фотоэлектр тизимларини тўғридан-тўғри харид қилиш, мамлакат ҳудудига олиб кириш, харидорларга етказиб ҳамда ўрнатиб бериш, шунингдек, уларга сервис хизматлари кўрсатишда ҳам ҳеч бир тадбиркорлик субъектига чеклов қўйилмаган.
«Аҳоли вакиллари, тадбиркорлар ўзлари истаган тадбиркорлик субъекти билан шартнома имзолаб, ўз ҳудудига қуёш фотоэлектр тизимларини ўрнатиши мумкин. Бунда ҳеч қандай мажбурлашларга ва харид қилишда қийинчиликлар туғдирадиган (қиммат нарх, фоизларни ошириш каби) ҳолатларга мутлақо йўл қўйилмайди», — дейилади вазирлик муносабатида.
Таъкидланишича, 2023 йил бошида 1 кВт қувватга тенг қуёш панелини ўрнатиш нархи 11,5 миллион сўмга тўғри келган бўлса, бу рақам бугунги кунда 8,5 миллион сўмдан иборат бўляпти.
