Покистонда поезд ҳалокатида жабрланганлар орасида ўзбекистонликлар йўқлиги маълум қилинди
Покистонда йўловчи поездининг рельсдан чиқиб кетиши оқибатида ҳалок бўлганлар сони 30 кишига, жабрланганлар сони эса 80 нафарга етди.
Покистон жануби-шарқида 6 август куни поезднинг рельсдан чиқиб кетиши оқибатида камида 30 киши ҳалок бўлди яна камида 80 киши жароҳатланган дея хабар бермоқда «Анадолу».
Таъкидланишича, Покистоннинг Синд вилоятида, Навабшоҳ шаҳри яқинида йўловчи поездининг 10 та вагони рельсдан чиқиб кетган. Ҳозирда воқеа жойида қутқарув гуруҳлари ва ҳарбийлар ишламоқда.
Тумандаги тиббиёт муассасаларида фавқулодда ҳолат эълон қилинган. Шунингдек, ушбу йўналишда поездлар ҳаракати тўхтатилган. Поезд ҳалокати сабаблари ҳозирча номаълум.
Бундан ташқари, «Дунё» ААнинг Ўзбекистон элчихонаси таяниб хабар беришича, Покистондаги темир йўл ҳалокати оқибатида ҳалок бўлганлар ва жароҳатланганлар орасида Ўзбекистон фуқаролари йўқ.
