Россияда Ўзбекистондаги банклардан бирининг собиқ раҳбари ушланди
Айбланувчи ҳуқуқ-тартибот органлари томонидан Ўзбекистонда қидирувга берилган.
Россияда Ўзбекистонда пул маблағларини ўзлаштиришда айбланаётган Қарши шаҳридаги банк филиалининг собиқ раҳбари қўлга олинди. Бу ҳақда Россиянинг Саратов вилояти прокуратураси хабар берди.
Тергов хулосасига кўра, айбланувчи 2019-2020 йилларда Қарши шаҳридаги банк филиали бошлиғи лавозимида ишлаб, бошқа шахслар номига кредит бериш тўғрисида қалбаки ҳужжатларни расмийлаштириб, пул маблағларини ўзлаштириб юборган.
Натижада давлат манфаатларига 53 миллион сўмдан ортиқ зарар етказилган. Бундан ташқари, у фуқароларнинг жами 33 миллион сўмлик пул маблағларини ва Ўзбекистон фуқаросининг паспортини ҳам ўзлаштириб олган. Гумонланувчи жорий йилнинг май ойида Саратов вилоятининг Озинский туманида чегара назоратидан ўтаётганда қўлга олинган.
Қайд этилишича, прокуратура Ўзбекистонда қидирувда бўлган 47 ёшли шахсга нисбатан экстрадиция текширувини якунлаган. Айбланувчини Ўзбекистон ҳуқуқ-тартибот органларига экстрадиция қилиш тўғрисида қарор қабул қилинган.
