Уйида қолган Мбаппе, Лукакуга чиққан янги харидор ва Неймарни ақлдан оздирган «соққа»ли иш
Европа трансфер бозорида кузатилган сўнгги янгиликлар.
Шу кунларда Европа трансфер бозорида бир қатор янгиликлар кузатилди. Zamon.uz сўнгги вақтларда амалга оширилган трансферлар ҳақида батафсил маълумотларни тақдим этади.
Мбаппе «ПСЖ»га қолади
Ушбу трансфер ойнасининг асосий мавзуси Килиан Мбаппе атрофида бўлмоқда. Ҳужумчи уч ҳафта олдин «ПСЖ»нинг асосий жамоасидан четлаштирилган эди ва энди Лига 1 1-туридан кўп ўтмай, футболчи жамоага қайтарилди. Клубнинг таъкидлашича, бу қарор «Лорен» билан муваффақиясиз ўйиндан олдин қабул қилинган. «The Atletic» нашри хабарига кўра, Париж клуби Мбаппенинг шартномани узайтиришидан ҳамон умидвор, бошқа нашрларнинг хабарига кўра, футболчи ҳаттоки жамоадан текинга кетмасликка ваъда берган.
Неймар Саудияга кўчиб ўтади
Неймарнинг «Ал-Ҳилол»га ўтиши деярли аниқ бўлди. Қайд этилишича, бразилиялик футболчи икки йилда 160 миллион евро ишлаб топади, «ПСЖ» эса 60 миллион евро олади. Бундан олдин Неймар ҳам «Лорен» билан бўлган ўйинда қайдномага киритилмаганди.
Манчини кутилмаганда Италия терма жамоасини тарк этди
Италия терма жамоаси бош мураббийи Роберто Манчини Евро-2024 бошланишига 10 ой қолганида ўз лавозимини тарк этди. Афтидан бу жамоанинг натижалари билан боғлиқ эмас. Кейинроқ италиялик журналист Николо Шира мураббий Саудия Арабистони терма жамоасини бошқаришга яқин тургани ҳақида хабар берди.
«Ал-Аҳли» Зелинскийга қизиқмоқда
«Наполи» ярим ҳимоячиси Зелинскийнинг Саудия Арабистонига ўтиши ҳақидаги маълумотлар бир неча ойлардан бери муҳокама қилинмоқда. Аввалига футболчининг «Ал-Ҳилол»га ўтиш эҳтимоли юқори эканлиги айтилганди. Бироқ, футбол инсайдери Фабрицио Романо поляк футболчисининг яқин орада «Ал-Аҳли»га ўтиши ҳақида маълумот берди. Хабар қилинишича, музокаралар якуний босқичда, футболчининг шахсий шартлари келишиб олинган.
«Тоттенҳем» Лукакуни нишонга олди
«Челси» ҳамон Лукакудан қутула олмаяпти. Аввалига «Интер» билан музокаралар тўхтаб қолди, кейин эса «Ювентус» билан келиша олмади. Қолаверса, Туринда мухлислар бундай трансферга кескин қарши чиқишди. Хабарларга кўра, футболчини сотиб олиш учун «Челси»га яқинда Ҳарри Кейнни «Бавария»га қўйиб юборган «Тоттенҳем» мурожаат қилган.
Кепа «Бавария»ни эмас, «Реал»ни танлади
«Челси» дарвозабони Кепа Аррисабалага ўтган куни Тибо Куртуа жиддий жароҳат олган «Реал Мадрид»га йўл олди. Қайд этилишича, испаниялик футболчи сотиб олиш ҳуқуқисиз ижарага берилади. «Бавария» бош директори Ян-Кристиан Дриесеннинг айтишича, Кепа Мюнхендан кўра Мадридни афзал кўрган.
Диего Коста янги клуб топди
34 ёшли ҳужумчи Диего Коста Бразилияга қайтди. У ерда у ўз фаолиятини ёшлар даражасида бошлаган, икки йил олдин футболчи «Атлетико Минеиро»да ўйнаган ва ҳозирда «Ботафого» билан шартнома имзолаган. Келишув аллақачон расман эълон қилинган. Шартнома 2023 йил охиригача мўлжалланган.
«ПСЖ» яна бир ҳужумчи топди
Париж клуби яна бир ҳужумчи билан музокара олиб бормоқда. Гап Бундеслиганинг сўнгги мавсумидаги асосий кашфиётларидан бири - «Айнтрахт» ҳужумчиси Коло Муани ҳақида кетмоқда. Журналист Флориан Плеттенбергнинг сўзларига кўра, франсиялик футболчи билан шахсий шартнома шартлари келишиб олинган ва немис клуби 100 миллион евро ва бонуслар олмоқчи.
Магуайр «Вест Хем»га ўтади
«Манчестер Юнайтед» ҳимоячиси Ҳарри Магуайр фаолиятини «Вест Хем»да давом эттиради. Фабрицио Романонинг сўзларига кўра, клублар 2019 йилда дунёнинг энг қиммат ҳимоячисига айланган футболчи учун 35 миллион еврога келишиб олган.
