Ўзбекистон автомобиль бозорида июль ойида ўсиш кузатилди

 

Иқтисодий тадқиқотлар ва ислоҳотлар маркази мутахассислари июль ойидаги Ўзбекистон автомобиль бозорини таҳлил қилди. Унга кўра, июль ойи якунларига кўра, автотранспорт воситалари савдоси 17 фоизга ўсиб, 144,5 мингтага етди. Шу билан бирга, ўтган йилнинг июль ойига нисбатан савдо ўсиши 40 фоизни ташкил этди.

 

Енгил автомобиллар

 

Республикада июль ойида сотилган енгил автомобилларнинг умумий сони 20 фоизга ўсиб, 132 мингдан ошди. Энг сезиларли ўсиш Бухоро — 36 фоиз, Сирдарё — 35 фоиз ва Сурхондарё вилоятларида — 31 фоиз қайд этилди. Енгил автомобиллари савдоси ўтган йилнинг июль ойига нисбатан 39 фоизга ошди.

 

Бирламчи автомобиль бозоридаги вазият

 

Кўриб чиқилаётган бир ой давомида бирламчи бозорда янги енгил автомобиллар савдоси 19,2 фоизга ошди. Ушбу кўрсаткич ўтган йилга нисбатан ўсиш 64,5 фоизни ташкил этди.

 

Бундан ташқари, июль ойида маҳаллий ишлаб чиқарилган янги енгил автомобиллар сегментида сотувлар сезиларли даражада ошди. Хусусан, 29,6 мингта автомобиль сотилди, бу июнь ойига нисбатан 24 фоиз ва ўтган йилнинг шу даврига нисбатан 59,3 фоиз кўпроқ.

 

Шунингдек, июль ойи давомида 4,9 мингта хорижда ишлаб чиқарилган янги енгил автомобиллар сотилди. Бу 2022 йил июль ойидаги кўрсаткичдан 2,7 баравар юқори.

 

Иккиламчи автомобиль бозоридаги вазият

 

Июль ойида енгил автомобилларнинг иккиламчи автомобиль бозори сотувларнинг ўсиши билан ажралиб турди. Ой давомида 97,6 минг дона енгил автомобиллар сотилди, бу бир ой олдингига нисбатан 17,6 фоизга кўпдир. Шу билан бирга, ўтган йилнинг июль ойига нисбатан 30 фоизга сезиларли ўсиш қайд этилди.

 

Электромобиллар бозори

 

Ой давомида енгил электромобиллар савдоси 28,9 фоизга ўсиб, 2,7 мингта автомобилни ташкил этди. Энг кўп сотилган электромобиллар Тошкент шаҳрида — 1,9 минг дона, Тошкент — 153 дона ва Хоразм вилоятларида — 117 дона қайд этилди.

 

Электромобилларнинг бирламчи бозори июнь ойига нисбатан 37,5 фоизга ўсиб, 2,3 мингтани ташкил этди, бу 2022 йил июль ойига нисбатан 4,7 баравар кўп.

 

Шу билан бирга, электромобилларнинг иккиламчи бозорида пасайиш кузатилди. Ой давомида жами 318 дона электромобил сотилган бўлиб, бир ойда 15,2 фоиз пасайган.