Россияда қарийб 500 кг кокаин билан ушланган шахслар оқланди
Москва шаҳар суди Эквадордан Санкт-Петербургга 472 килограмм кокаин олиб ўтишда айбланганларни оқлади.
Москва шаҳар суди Эквадордан 472 килограмм кокаинни Санкт-Петербург порти орқали олиб ўтиш бўйича 2019 йилда қўлга олинган Литванинг уч фуқароси ва икки нафар россияликни оқлади, деб ёзади «Ведомости».
Гумонланувчилар Эрнестас Казлаускас, Миндаугас Корецас, Игорис Григас, Георгий ва Иван Радомировлар гиёҳванд моддалар етказиб бериш мақсадида уюшган жиноий гуруҳ тузишда айбланган. Уларга умрбод қамоқ жазоси билан таҳдид қилинган.
Контрабанда иши кўриб чиққан ҳакамлар ҳайъатининг фикрича, уюшган жиноий гуруҳ тузиш нуқтаи назаридан ҳеч қандай жиноий ҳодиса юз бермаган ва айбланувчиларнинг гиёҳванд моддалар контрабандасига алоқадорлиги исботланмаган.
Натижада айбланувчилар суд залининг ўзида қамоқдан озод қилинган. Эндиликда ҳукм қонуний кучга кирса, улар реабилитация ва моддий товон пулига умид қилишлари мумкин.
