ECOWAS делегацияси музокара учун Нигерга келди
Улар вазиятни ҳал қилишда дипломатик воситачи сифатида ҳаракат қилади.
Ғарбий Африка мамлакатлари иқтисодий ҳамжамияти (ECOWAS) делегацияси мамлакатда ҳокимиятни қўлга олган ҳарбийлар билан музокара ўтказиш учун Нигерга етиб келди.
Қайд этилишича, ECOWAS вакиллари Нигердаги вазиятни ҳал қилишда дипломатик воситачи сифатида ҳаракат қилади.
Нигернинг ағдарилган президенти Муҳаммад Базум ҳукуматида бош вазир вазифасини ҳам бажарган Асуми Масуду тўнтаришдан кейин Франциянинг республикага ҳарбий аралашувига рухсат берувчи ҳужжатни имзолаганди. Француз ҳарбийлари Нигер миллий гвардияси штаб-квартирасига 27 июль куни етиб келган. Уларнинг ихтиёрида ўнлаб машиналар бўлган, вертолётлар ҳам шай ҳолатда эди. Бироқ Базумнинг ўзи бу операцияга қарши чиқди.
Аввалроқ ECOWASʼнинг сиёсий ишлар, тинчлик ва хавфсизлик бўйича комиссари Абдел-Фатау Муса Ғарбий Африка Иқтисодий ҳамжамиятига аъзо давлатлар БМТ Хавфсизлик Кенгашидан Нигер ишларига ҳарбий аралашув учун рухсат сўрамоқчи эмаслигини маълум қилганди.
