Ҳафта охиригача ўртача иссиқ об-ҳаво бўлиши кутилмоқда
Гидрометеорология хизматининг хабар беришича, айрим ҳудудларга 25 августдан Волга бўйи ҳудудларидан салқин ҳаво массаси тарқала бошлайди.
«Ўзгидромет» маълумотларига кўра, 21-25 август кунлари Ўзбекистон ҳудудининг катта қисмида ҳаво кам булутли бўлади, ёғингарчилик кутилмайди. Фақат бугун, 21 август кундузи республиканинг шимоли-ғарбий ҳудудларида баъзи жойларда ва 22-24 август кунлари айрим тоғли ҳудудларда қисқа муддатли ёмғир ёғиши, момақалдироқ бўлиши мумкин.
Ҳаво ҳарорати асосан кечалари 18-23 даража, кундузи 21 августда 34-39 даража, 22-23 августда 32-37 даража, 24-25 августда эса 34-39 даража бўлади.
Қайд этилишича, Ўзбекистоннинг шимоли-ғарбий ҳудудларига 25 август куни Волга бўйи ҳудудларидан салқин ҳаво массаси тарқала бошлайди. Натижада Қорақалпоғистон Республикаси ва Хоразм вилоятида кундузги ҳарорат 30-35 даражагача пасаяди.
Шунингдек, 20 августда шимолда ва чўл ҳудудларда баъзи жойларда шамол тезлиги 15-20 метр/секундгача кучайиши, айрим жойларда чанг-тўзон билан кузатилиши мумкин.
