Москвада ер остига саёҳат қилган беш киши ҳалок бўлди
Қурбонлар сони яна ортиши мумкин.
Москвада ер ости коллекторларини кўриш учун ноқонуний экскурсияда қатнашган бир гуруҳ одамлар ғойиб бўлди. Айни пайтда ер остида беш киши ҳалок бўлгани маълум, дея хабар берди ТАSS.
«Ҳозирда ноқонуний экскурсияда қатнашган беш киши вафот этгани тасдиқланди. «Зарядье» боғи яқинида яна бир кишининг жасади топилди», — деб ёзади агентлик манбага таяниб.
Аввалроқ тўрт кишининг жасади топилгани хабар қилинганди.
21 август куни эрталаб диггерларнинг (ер ости бошпаналари ва бошқа ер ости объектларини ўрганувчилар) ғойиб бўлгани ҳақида маълум бўлди. Москвада тўсатдан ёмғир ёға бошлади ва коллекторлар сувга тўлди. Фавқулодда ҳолат бўйича жиноий иш қўзғатилган. Терговчилар ноқонуний экскурсия уюштирган шахсни сўроқ қилишмоқда.
Москва мэри Сергей Собянин ҳалок бўлганларнинг оила аъзоларига ҳамдардлик билдириб, қидирув ишлари давом этаётганини маълум қилди.
Дастлабки ҳисоб-китобларга кўра, диггерлар гуруҳи саккиз кишидан иборат бўлган.
